Псалом сей, Давиду от Духа Святаго в написание изъявленный. В немже содержится хвала величия Бога Вседержителя от всемогущия силы Его, от премудрости, истины, суда и безчисленных пречудных дел Его, от промышления Его Божественнаго о всем создании, о вочеловечении же Христа Господа, о благоутробии Его и превечнем Царствии (Афанасий, Феодорит).

Велик Бог, ни начала, ни конца Ему несть, безначален бо и безконечен.

Вернии в сем роде, от воды и Духа раждаеми в сыны Божия, в другом роде сынове будут Воскресения.

Великолепие славы Христовы — Плоть Его Божественная, еюже питающеся вернии, прославляют Его.

Сила страшных Таин Христовых, достойным в живот вечный, а недостойным во осуждение.

Множество благости Христовы, яко воплотися, и плоть человеческую вознесе на небеса. Правдою возрадуются, получившим правую страну.

Вся дела Господня — весь мир, видимый и невидимый. Преподобный — апостоли, пророцы, мученицы, и вси избраннии от мира.

Слава царствия Христова, тайна воплощения Его, юже апостоли святии по вселенней прославиша, и сипу Божию возвестиша.

Яко аще кто не родится водою и Духом, не может внити в Царствие Божие (Ин. 3:5). Слава великолепия — одесную Отца седение Христово с пречистою плотию.

Царствие Христово прежде век, в настоящем вег/е, и в грядущем безконечно есть. Владычество, яко владеет Христос Господь роды земными и небесными. Верен Христос Господь, еже обеща, то и содела: Слово бо плоть бысть и вселися в ны. Преподобен, яко еже творит, все право творит, комуждо воздая по делом его.

Елицы нечестием падоша, сих Христос Господь веровавших в Нею, подъят от земли на небо, и низверженных идолослужением, исправи благочестием.

Питает Христос Господь верных Своим Телом и Кровию Своею во благо время, егда прияти удостояются.

Рука Божия — изобильное всяких благ подаяние, на препитание человеков и скотов во время требования.

Пути Божии, изволение Божие, имже сего смиряет, и сего возносит.

Близ Господь, рече бо: «Се стою при дверех и толку: аще кто отверзет двери, вниду к нему, и вечеряю с ним, и той со Мною» (Откр. 3:20).

Хотение Бог исполняет сих, иже Его хотение исполняют. Кто Бога боится, сей повеление Его тщится исполнят, и услышан от Него бывает.

Любящий Бога, яко три отроцы в пещи сохранени: Даниил в рове от уст Львовых, Лот от пагубы содомския, и прочий; грешники же потребит, егда речет: отыдите от Мене, проклятии.

На всякое время благодарите Христа Бога усты и сердцем, всем мужеска полу и женска, именем Христовым нарицающимся.

Источник

Псалтирь с толкованиями. М.: Сибирская Благозвонница, 2012 (переизд. книги 1861 г.), ред. Н. С. Посадский.

Псалтирь, Глава 144, стих 1