Пророк, Духа Святаго исполнен, изъявляет, в небрежении мирския суеты, едину всемощную силу Бога всяческих Содетеля, в начинание и совершение всякаго во благих желаемаго дела благополезну, и доблетворну. Дом же, во псалме сем именуемый, знаменует наипаче Церковь православных, от всяких племен составленную, и благодатию начальника и совершителя Христа Господа совершенную.

Дом — Церковь Святая, зиждемая Христом Спасителем, в наследие нетленное на небесех (1 Пет. 1:4).

Град душевный — плоть человеческая, никим иным, точию Богом хранима: без Божия бо соблюдения, абие прах и пепел.

Суетно той востает рано, иже во тьме греха без покаяния пребывает, воставати по седении от тленныя пищи, болезнь смертну приносящия, на дело брашна негиблющаго, но пребывающаго в живот вечный (Ин. 6:27). Праведных сон — вечное упокоение, за богоугодныя труды.

Плод духовен — крещение святое, имже отрождаются сынове тьмы, в сыны света, и бывает мзда или достояние Господне.

Сынове отрясеных — апостоли святии, яко стрелы от руки сильного Христа Бога пущени в мир, на поражение богомерзскаго идолослужения.

Желание вечнаго живота, исполняется учением апостольским Евангельския истины. Врата — вера святая во Христа Господа: в тех вратах сущии не постыждаются обличающе нечестивых. Ибо мытарства праведнии проходят, врата райские отверзаются им, на Суде получат они правое стояние и услышат взывание: приидите, благословеннии Отца Моего.

Источник

Псалтирь с толкованиями. М.: Сибирская Благозвонница, 2012 (переизд. книги 1861 г.), ред. Н. С. Посадский.

Толкования. Псалтирь, Глава 126, стих 4