Аллилуиа, песнь радостная хваления Божественнаго, юже от псалма сего Давидова, радости и веселия исполненнаго, пророки, Аггей и Захариа, повелеваху людем израильским воспевати с веселием, в память возвращения от пленения Вавилонскаго во Иерусалим; еже разумеется о веселии в воспоминание возвращения новых людей, благодатию Христа Господа от пленения Вавилона греховнаго, в свободу Небеснаго Иерусалима изведенных, на вечное хваление Божественное. Наставляет же во псалме сем пророк всякаго, надежду возлагати на единаго точию Бога, а не человека: проклят бо человек, иже надеется на человека (Иер. 17:5) (Евфимий).

Душею хвалити Бога, яко душа вышшая есть от тела; без души бо тело мертво есть.

В животе хвалити, сиесть вся дни живота даже до смерти.

Царие и князи и всякия власти смертны тако, яко и прочий людие. Вси единым Христом Господем спасаеми, яко единым Спасителем.

Духом называет душу. Егда душа от тела разлучится, тело яко земля в землю возвратится, а душа праведнаго к Богу, и уже о земных тело мертвое не мыслит, токмо душа печется о Страшном суде.

Души, как говорят святые отцы, все помнят из того, что было содеяно: и слова, и дела, и помышления, и ничего из этого не могут тогда забыть. И погибнут помышления века сего: о строениях, имуществе, родителях, детях и всяком даянии и получении (Дорофей).

Бог Иаковлъ, в Негоже Иаков право верова, и везде его Бог сохраняше; и всяк верующий во Христа Господа соблюдаемь есть от Него.

Бог познаваемь есть от создания, яко Творец от твари, Сам же есть непостижим и недоведом. Истина Божия — обещания Его непременное.

Христос Бог — упование наше, яко Его держава, Царство и сила, и слава во веки веков.

Воздает Бог вечное отмщение судящим неправедно, и дает верным тайную пищу алчущим живота вечнаго. Окованных узы греховными, Адама с прочими, разреши Христос Господь, сошед на ада.

Слепцы — омраченнии прелестию демонскою, просвещеннии истинным Светом, Христом Господем. Адама с прочиими низверженнаго до ада, воздвиже Христос Господь из ада. Любовь Божия к праведным, поставит бо их одесную Себе.

Пришлец, приходяй от злочестия, во благочестие. Сирота, иже за грех лишен бывает Отца Небеснаго. Вдова—душа, егда несть обрученна Христу Богу крещением святым. Путь грешных — советы и течение на грех.

Сион — Церковь Святая, о Царе Христе на земли крепка, и на небе торжествует во веки.

Источник

Псалтирь с толкованиями. М.: Сибирская Благозвонница, 2012 (переизд. книги 1861 г.), ред. Н. С. Посадский.

Толкования. Псалтирь, Глава 145, стих 5